බෝම්බ තර්ජනයෙන් පසු Amitabh Bachchanට විශේෂ ආරක්ෂාවක්! වෙඩි නොවදින වීදුරු ආවරණයක් පිටුපස සිට රසිකයන්ට ආචාර කරයි.

බොලිවුඩයේ ප්‍රවීණ රංගන ශිල්පී Amitabh Bachchan සිය මුම්බායිහි පිහිටි Jalsa නිවස ඉදිරිපිටට පැමිණෙන රසිකයන් හමුවීමේ සුපුරුදු සම්ප්‍රදාය මෙවරත් අඛණ්ඩව පවත්වාගෙන ගොස් තිබේ. කෙසේ වෙතත්, පසුගිය නොවැම්බර් 01 වැනිදා පැවති මෙම හමුවීමේදී ඔහුට විශේෂ ආරක්ෂක විධිවිධාන යටතේ රසිකයන්ට ආචාර කිරීමට සිදුව තිබීම විශේෂත්වයකි.

ඒ අනුව, සිය නිවස ඉදිරිපිට රැස්ව සිටි රසිකයන්ට ආචාර කිරීම සඳහා පැමිණි Amitabh Bachchan මෙවර ආරක්ෂිත වීදුරු ආවරණයකින් වටකරන ලද ස්ථානයක් තුළ සිට සිය ආචාරය පිරිනමා තිබේ. එහිදී ඔහු රසිකයන් වෙත දෑත් එක්කර ආචාර කරන ආකාරය සහ ඔවුන් වෙත අත වනමින් ප්‍රතිචාර දක්වන ආකාරය දැක්වෙන ඡායාරූප සහ වීඩියෝ ද සමාජ මාධ්‍ය ඔස්සේ ප්‍රචාරය වී තිබේ.

මෙම විශේෂ ආරක්ෂක විධිවිධාන සඳහා ආසන්නතම පසුබිම වී ඇත්තේ පසුගිය ඔක්තෝබර් 23 වැනිදා Amitabh Bachchanගේ නිවස ඇතුළු ස්ථාන කිහිපයක් ඉලක්ක කරගනිමින් එල්ල කරන බවට තර්ජනය කළ ඊමේල් පණිවිඩයකි.

මුම්බායි නගරාධිපති කාර්යාලයට ලැබුණු එම තර්ජනාත්මක ඊමේල් පණිවිඩය මගින් Amitabh Bachchanගේ Jalsa නිවස, මුම්බායි මහ නගර සභා මූලස්ථානය සහ Mahalaxmi Racecourse යන ස්ථානවල බෝම්බ පිපිරවීම් සිදුකරන බවට සඳහන් කර තිබූ බව ඉන්දීය මාධ්‍ය වාර්තා කර තිබේ. මේ සම්බන්ධයෙන් මුම්බායි පොලිසිය විමර්ශන ආරම්භ කර තිබූ අතර, අදාළ ස්ථානවල ආරක්ෂාව සහ නිරීක්ෂණ කටයුතු ද තර කර තිබේ.

එමෙන්ම, පසුගිය ඔක්තෝබර් 18 වැනිදා මුම්බායිහි Juhu ප්‍රදේශයේදී නළු Tiger Shroff ගමන් කරමින් සිටි මෝටර් රථයට වෙඩි තැබීමේ සිදුවීමක් ද වාර්තා වී තිබුණි. එම සිදුවීමෙන් අනතුරුව බොලිවුඩ් රංගන ශිල්පීන්ගේ ආරක්ෂාව සම්බන්ධයෙන් ද වැඩි අවධානයක් යොමුව තිබේ.

මෙවර රසිකයන් හමුවීමට පැමිණි අවස්ථාවේදී Amitabh Bachchanගේ පුත් Abhishek Bachchan ද සිය පියා අසල රැඳී සිටිමින් අවට ආරක්ෂක තත්ත්වය පිළිබඳ අවධානයෙන් සිටින ආකාරය දැකගත හැකි විය.

දශක හතරකට අධික කාලයක් පුරා Amitabh Bachchan විසින් පවත්වාගෙන එන මෙම සතිපතා රසික හමුවීම ‘Sunday Darshan’ ලෙස ප්‍රසිද්ධියට පත්ව තිබේ. සෑම ඉරිදා දිනකම ඔහුගේ නිවස ඉදිරිපිටට රැස්වන රසිකයන්ට දැකගැනීමට සහ ආචාර කිරීමට ඔහු පැමිණීම දිගුකාලීන සම්ප්‍රදායකි.

කෙසේ වෙතත්, මෙවර එම සම්ප්‍රදාය අඛණ්ඩව පවත්වාගෙන ගිය ද, ආරක්ෂිත වීදුරු ආවරණයක් භාවිත කිරීමත් සමඟ මෙම හමුවීම බොහෝ දෙනාගේ අවධානයට ලක්ව තිබේ.

අදාළ ආරක්ෂිත වීදුරු ආවරණය යෙදවීම රජයේ ආරක්ෂක පියවරක් ද නැතහොත් පෞද්ගලිකව ගත් තීරණයක් ද යන්න පිළිබඳව නිල වශයෙන් පැහැදිලි කිරීමක් වාර්තා වී නොමැත.