ෂාරුක් ඛාන්ගේ උපන්දිනය වෙනුවෙන් ඩුබායිහි බර්ජ් කලීෆා ආලෝකමත් වෙයි

බොලිවුඩ් සුපිරි නළු ෂාරුක් ඛාන්ගේ උපන්දිනය වෙනුවෙන් ඩුබායිහි පිහිටි ලොව උසම ගොඩනැගිල්ල වන බර්ජ් කලීෆා විශේෂ ආලෝක සංදර්ශනයකින් අලංකාර කර තිබේ.

නොවැම්බර් 2 වැනිදාට යෙදී තිබූ ෂාරුක් ඛාන්ගේ උපන්දිනය සැමරීම සඳහා බර්ජ් කලීෆා ගොඩනැගිල්ලේ ඔහුගේ දැවැන්ත ඡායාරූපයක් ප්‍රදර්ශනය කර තිබූ අතර, ඒ සමඟ “WE LOVE YOU SRK” යන ආදරණීය පණිවිඩය ද ප්‍රදර්ශනය කර තිබිණි.

බර්ජ් කලීෆා වෙතින් ෂාරුක්ට ලැබෙන වාර්ෂික උපන්දින සුබපැතුම

ෂාරුක් ඛාන්ගේ උපන්දිනය වෙනුවෙන් බර්ජ් කලීෆා මෙලෙස ආලෝකමත් කෙරුණු පළමු අවස්ථාව මෙය නොවේ. සෑම වසරකම නොවැම්බර් 2 වැනිදා ඔහුගේ උපන්දිනය වෙනුවෙන් මෙම ප්‍රසිද්ධ ගොඩනැගිල්ල විශේෂ පණිවිඩ සහ ඔහුගේ ඡායාරූප ප්‍රදර්ශනය කරමින් සැරසීම සිදුකරයි.

මීට පෙර වසරවලදී ද “HAPPY BIRTHDAY SHAH RUKH”, “HAPPY BIRTHDAY SRK” සහ “WE LOVE YOU” වැනි සුබපැතුම් පණිවිඩ ඔහුගේ ඡායාරූප සමඟ ප්‍රදර්ශනය කර තිබේ.

මෙම උපන්දින සැමරුම්වලට ඩුබායි ෆවුන්ටන් ආශ්‍රිත විශේෂ ජල සංදර්ශන ද ඇතුළත් වී ඇති අතර, එහිදී ෂාරුක් ඛාන් රංගනයෙන් දායක වූ චිත්‍රපටවල ජනප්‍රිය ගීත ද වාදනය කර තිබේ. ඒ අතර ‘Om Shanti Om’ සහ ‘Dilwale Dulhania Le Jayenge’ වැනි චිත්‍රපටවල ගීත ද ඇතුළත්ය.

මුම්බායිහි මුහුදු පාලමත් ෂාරුක් වෙනුවෙන් ආලෝකමත් වෙයි

මේ අතර, මුම්බායිහි බන්ද්‍රා-වර්ලි මුහුදු පාලම ද ෂාරුක් ඛාන් සහ ඔහුගේ ඉදිරි චිත්‍රපටය වන ‘KING’ වෙනුවෙන් විශේෂ ආලෝක සැරසිල්ලකින් අලංකාර කර තිබිණි.

එම දර්ශනය දැකබලා ගැනීම සඳහා ෂාරුක් ඛාන් ද රහසිගතව රථයකින් එම ප්‍රදේශයට ගොස් තිබූ අතර, එහිදී දර්ශනීය ආලෝක සැරසිල්ලේ ඡායාරූපයක් ලබාගෙන සිය රසිකයන් සමඟ බෙදාගෙන තිබේ.

ඔහු X සමාජ මාධ්‍ය වේදිකාව ඔස්සේ එම ඡායාරූපය පළ කරමින් තමන් වෙනුවෙන් දැක්වූ ආදරයට ස්තූතිය පළ කර තිබිණි. එහිදී Google Gemini වෙත ද “KING-sized love” යනුවෙන් සඳහන් කරමින් ස්තූති කර ඇති ඔහු, එම විශේෂ අවස්ථාව ඡායාරූපගත කිරීම සඳහා තමන් රහසිගතව රථයකින් එම ස්ථානයට ගිය බව ද හෙළි කර තිබේ.

‘KING’ චිත්‍රපටයේ පළමු ගීතයත් එළිදැක්වෙයි

ෂාරුක් ඛාන්ගේ උපන්දින සැමරුම් අතරතුර ඔහු රංගනයෙන් දායක වන ඉදිරි චිත්‍රපටය වන ‘KING’ හි පළමු ගීතය ද නොවැම්බර් 2 වැනිදා මධ්‍යම රාත්‍රියේ නිකුත් කර තිබේ.

‘Tu Mil Jaaye’ ලෙස නම් කර ඇති මෙම ගීතය තුළ ෂාරුක් ඛාන් සහ දීපිකා පදුකෝන් නැවතත් එකට දැකගත හැකි අතර, ගීතය සඳහා අරිජිත් සිංගේ ගායනය සහ එඩ් ෂීරන්ගේ රැප් ගායනය ද එක්ව තිබේ.

ඒ අනුව මෙවර ෂාරුක් ඛාන්ගේ උපන්දින සැමරුම ඩුබායිහි බර්ජ් කලීෆා සිට මුම්බායිහි මුහුදු පාලම දක්වා විහිදුණු විශේෂ අවස්ථාවක් බවට පත්ව තිබේ.